ಬಂಡುಣಿಗಳಂತಿಹರು | ಭಂಡನೆರೆ ಯಾಡುವರು ಕಂಡುದನು ಅರಿದು ನುಡಿಯರಾ ಹಾರುವರು | ಭಂಡರೆಂದರಿಗು ಸರ್ವಜ್ಞ ||

ಬಂದಿಹೆನು ನಾನೊಮ್ಮೆ | ಬಂದು ಹೋಗುವೆನೊಮ್ಮೆ ಬಂದೊಮ್ಮೆ ಹೋಗೆ ಬಾರೆ ನಾಂ ಕವಿಗಳಲಿ | ವಂದ್ಯರಿಗೆ ಪೇಳಿ ಸರ್ವಜ್ಞ ||

ಬಂಧನದಲಿರುವನು | ಹಂದಿಯಂತಿಹನು ಬಂಧವಿಲ್ಲದವನು ಬಡವನು ದೇಶಿಗನು | ಎಂದಳಿದರೇನು ಸರ್ವಜ್ಞ ||

ಬರಕೆ ಬುತ್ತಿಯು ಹೊಲ್ಲ | ಸಿರಿಕಾ ಮನೆ ಹೊಲ್ಲ | ಕರೆಕರೆಯ ಕೂಳು ತಿನಹೊಲ್ಲ | ಕಜ್ಜಿಯನು ಕೆರೆಕೊಳ್ಳ ಹೊಲ್ಲ ಸರ್ವಜ್ಞ ||

ಬರೆವ ಕರಣೀಕನೊಡನೆ | ಹಿರಿದು ಜಗಳವು ಬೇಡ | ಗರಗಸದ ಒಡನೆ ಮರನಾಡಿ ತನ್ನತಾ | ನಿರಿದುಕೊಂಡಂತೆ ಸರ್ವಜ್ಞ ||

ಬಲವಂತ ನಾನೆಂದು | ಬಲುದು ಹೋರಲು ಬೇಡ | ಬಲವಂತ ವಾಲಿ ಶ್ರೀರಾಮನೊಡನಾಡಿ | ಛಲದಿಂದ ಕೆಟ್ಟ ಸರ್ವಜ್ಞ ||

ಬಲವಂತರಾದವರು | ಕಲಹದಿಂ ಕೆಟ್ಟಿಹರು | ಬಲವಂತ ಬಲಿಯು ದುರ್ಯೋಧನಾದಿಗಳು | ಛಲದಲುಳಿದಿಹರೆ ಸರ್ವಜ್ಞ ||

ಬಲ್ಲಿದನು ನುಡಿದಿಹರೆ | ಬೆಲ್ಲವನು ಮೆದ್ದಂತೆ | ಇಲ್ಲದಾ ಬಡವ ನುಡಿದಿಹರೆ - ಬಾಯಿಂದ | ಜೊಲ್ಲು ಬಿದ್ದಂತೆ ಸರ್ವಜ್ಞ ||

ಬಸವನೆಂದರೆ ಪಾಪ ದೆಸೆಗೆಟ್ಟು ಹೋಗುವದು | ಬೆಸಿ ಲಿಂಗ ಹಸುರೆಳಸದಿರ್ಪ ಹನಿಯಾರಿ ಹಸಿದು ಹೋದಂತೆ ಸರವಜ್ಞ ||

ಬಾಲ್ಯ - ಯೌವನ ಪ್ರೌಢ | ಲೋಲ ಹಲವಾದ ತನು ಏಳುತ್ತ ಮಡುವುತಿರ ಬೇಡ - ಅನುದಿನವು ಶೊಲಿಯ ನೆನೆಯ ಸರ್ವಜ್ಞ

ಬಾಲ್ಯಯೌವನದೊಳಗೆ | ಲೋಲುಪ್ತನಾಗಿ ನೀ | ನೇಳುತುಲಿ ಮದಿಸುತ್ತಿರಬೇಡ ಅನುದಿನವು | ಸೂಲಿಯನು ನೆನೆಯೋ ಸರ್ವಜ್ಞ ||

ಬಿತ್ತದಾ ಹೊಲ ಹೊಲ್ಲ | ಮೆತ್ತದಾ ಮನೆ ಹೊಲ್ಲ | ಚಿತ್ತ ಬಂದತ್ತತಿರುಗುವಾ ಮಗ ಹೊಲ್ಲ | ಬತ್ತಲಿರ ಹೊಲ್ಲ ಸರ್ವಜ್ಞ ||

ಬಿಂದುವ ಬಿಟ್ಟು ಹೋ | ದಂದು ಬಸುರಾದಳವ ಳಂದದಿಯಷ್ಟಾದಶ ಮಾಸ - ಉದರದಲಿ ನಿಂದು ನಾ ಬೆಳೆದೆ ಸರ್ವಜ್ಞ

ಬಿಲ್ಲನೇರಲು ಗುರುವು | ತಲ್ಲಣವು ಜಗಕೆಲ್ಲ | ಕಲ್ಲು ಮೇಲೆಲ್ಲ ಮಳೆಯಕ್ಕು ನೃಪರಿಗೆ | ತಲ್ಲಣವೇ ಅಕ್ಕು ಸರ್ವಜ್ಞ ||

ಬುದ್ಧಿವಂತರ ಕೂಟ| ವೆದ್ದು ಗಾರುವ ಹದ್ದು | ಬುದ್ಧಿಯಿಲ್ಲದವರ ನೆರೆ ಕೂಟ ಕೊರಳೊಳಗೆ | ಗುದ್ದಿಯಿದ್ದಂತೆ ಸರ್ವಜ್ಞ ||