ಮಾಳಗೆಯ ಮನೆ ಲೇಸು | ಗೂಳಿಯಾ ಪಶುಲೇಸು | ಈಳೆಯಾ ಹಿತ್ತಲಿರಲೇಸು | ಪತಿವ್ರತೆಯ ಬಾಳು ಲೇಸೆಂದ ಸರ್ವಜ್ಞ ||

ಮಾಳನು ಮಾಳಿಯು | ಕೊಳ್ ತಿಂದ ಹೆಮ್ಮೆಯಲಿ ಕೇಳೆ ನೀನಾರ ಮಗನೆಂದು - ನಾ ಶಿವನ ಮೇಳದಣುಗೆಂಬೆ ಸರ್ವಜ್ಞ

ಮಿಥುನಕ್ಕೆ ಗುರು ಬರಲು | ಮಥನಲೋಕದೊಳಕ್ಕು | ಪೃಥ್ವಿಯೊಳಗೆಲ್ಲ ರುಜವಕ್ಕು ನರಪಶು | ಹಿತವಾಗಲಕ್ಕೂ ಸರ್ವಜ್ಞ ||

ಮೀನಕ್ಕೆ ಗುರು ಬರಲು | ಮಾನಖಂಡಗವಕ್ಕು ಕಾನನವೆಲ್ಲ ಬೆಳೆಯಕ್ಕು ಪ್ರಜೆಗಳಿಗೆ | ಆನಂದವಕ್ಕು ಸರ್ವಜ್ಞ ||

ಮೀನಕ್ಕೆ ಶನಿ ಬರಲು | ಶಾನೆ ಕಾಳಗವಕ್ಕು | ಬೇನೆ ಬಂಧಾನಗಳು ತಾವಕ್ಕು ಬರನಕ್ಕು ಲೋಕಕ್ಕೆ | ಹಾನಿಯೇ ಬಕ್ಕು ಸರ್ವಜ್ಞ ||

ಮೀರಿ ಬೆಳೆಯಲ್ಕೆನಗೆ | ಅರಿ ಬಣ್ಣವನುಡಿಸಿ ಮೂರು ರುಚಿದೋಳು ಶಿವ - ತನ್ನನು ತೋರದೇ ಹೋದ ಸರ್ವಜ್ಞ

ಮುಗೈಯ ಲಾಡುವದು | ಹಿಂಗುವದು ಹೊಂಗುವದು ಸಿಂಗಿಯಲಿ ಸೀಳಿ ಬಿಡುತಿಹುದು ಆ ಮಿಗದ ಸಂಗವನು ನೋಡು ಸರ್ವಜ್ಞ ||

ಮುಟ್ಟಾದ ಹೊಲೆಯೊಳಗೆ | ಹುಟ್ಟುವುದು ಜಗವೆಲ್ಲ | ಮುಟ್ಟಬೇಡೆಂದ ತೊಲಗುವಾ ಹಾರುವನು | ಹುಟ್ಟಿರುವನೆಲ್ಲಿ ಸರ್ವಜ್ಞ ||

ಮುಟ್ಟಿದಂತಿರಬೇಕು | ಮುಟ್ಟದಲೆ ಇರಬೇಕು | ಮುಟ್ಟಿಯೂ ಮುಟ್ಟಿದಿರಬೇಕು ಪರಸ್ತ್ರೀಯ | ಮುಟ್ಟಿದವ ಕೆಟ್ಟ ಸರ್ವಜ್ಞ ||

ಮುತ್ತು ಮುದುಕಿಗೆ ಏಕೆ | ತೊತ್ತೇಕೆ ಗುರುಗಳಿಗೆ | ಬತ್ತಿದಾ ಕೆರೆಗೆ ಮಿಗವೇಕೆ ಸವಣರಿಗೆ | ಮಿಥ್ಯತನವೇಕೆ ಸರ್ವಜ್ಞ ||

ಮುನಿವರನನು ನೆನೆಯುತಿರು | ವಿನಯದಲಿ ನಡೆಯುತಿರು | ವನಿತೆಯರ್ ಬಲೆಗೆ ಸಿಲುಕದಿರು ಬಾಳಿಕೆಯ | ಮನಘನವು ಅಕ್ಕು ಸರ್ವಜ್ಞ ||

ಮುನ್ನ ಮಾಡಿದ ಪಾಪ | ಹೊನ್ನಿನಿಂ ಪೋಪುದೇ ? ಹೊನ್ನಿನಾ ಪುಣ್ಯವದು ಬೇರೆ; ಪಾಪ ತಾ | ಮುನ್ನಿನಂತಿಹುದು ಸರ್ವಜ್ಞ ||

ಮುರಿದ ಹೊಂಬೆಸೆಯವಡೆ | ಕಿರಿದೊಂದು ರಜ ಬೇಕು | ಮುರಿದ ಕಾರ್ಯವನು ಬೆಸೆಯುವಡೆ ಮತ್ತೊಂದ | ನರಿಯದವರು ಬೇಕು ಸರ್ವಜ್ಞ ||

ಮೂರು ಕಾಲಲಿ ನಿಂದು | ಗೀರಿ ತಿಂಬುವದು ಮರವ | ಆರಾರು ನೀರು ಕುಡಿಯುವದು ಕವಿಗಳಲಿ | ಧೀರರಿದ ಪೇಳಿ ಸರ್ವಜ್ಞ ||

ಮೂರು ಖಂಡುಗ ಹೊಟ್ಟ | ತೂರಿದರೆ ಫಲವೇನು | ಮೂರರಾ ಮಂತ್ರದಿಂದಲಿ ಪರಬೊಮ್ಮ | ವಿರಿಹುದು ನೋಡು ಸರ್ವಜ್ಞ ||