ಕುಲಗೆಟ್ಟವರ ಚಿಂತೆ | ಯೊಳಗಿರ್ಪರಂತೆಲ್ಲ ಕುಲಗೆಟ್ಟು ಶಿವನ ಮರೆಹೊಕ್ಕೆ - ಋಷಿಗಳು ಕುಲಗೋತ್ರರುಗಳು ಸರ್ವಜ್ಞ

ಕುಲವನ್ನು ಕೆಡಿಸುವದು | ಛಲವನ್ನು ಬಿಡಿಸುವದು | ಹೊಲೆಯನಾ ಮನೆಯ ಹೊಗಿಸುವದು ಕೂಳಿನಾ | ಬಲವ ನೋಡೆಂದ ಸರ್ವಜ್ಞ ||

ಕುಲವಿಲ್ಲ ಯೋಗಿಗಂ | ಛಲವಿಲ್ಲ ಜ್ಞಾನಿಗಂ | ತೊಲೆ ಕಂಭವಿಲ್ಲ ಗಗನಕ್ಕೆ ಸ್ವರ್ಗದಲಿ | ಹೊಲಗೇರಿಯಿಲ್ಲ ಸರ್ವಜ್ಞ ||

ಕುಸ್ತಿಯಲಿ ಭೀಮಬಲ | ಕುಸ್ತಿಯಲಿ ಕಾಮಬಲ | ಅಸ್ತಿ ಮುರಿದಿಹುದು ಕೀಚಕನ ಪರಸತಿಯ | ಪ್ರಸ್ತವೇ ಬೇಡ ಸರ್ವಜ್ಞ ||

ಕೂಡಿ ತಪ್ಪಲು ಬೇಡ | ಓಡಿ ಸಿಕ್ಕಲು ಬೇಡ | ಆಡಿ ತಪ್ಪಿದರೆ ಇರಬೇಡ ದುರುಳರು | ಕೂಡಬೇಡೆಂದ ಸರ್ವಜ್ಞ ||

ಕೂಳಿಂದ ಕುಲ ಬೆಳೆದು | ಬಾಳಿಂದ ಬಲ ಬೆಳೆದು | ಕೂಳು - ನೀರುಗಳು ಕಳೆದರ್‍ಆ ಕುಲಗಳನ್ನು | ಕೇಳಬೇಡೆಂದ ಸರ್ವಜ್ಞ ||

ಕೂಳಿಲ್ಲದವನೊಡಲು | ಹಾಳುಮನೆಯಂತಕ್ಕು | ಹೇಳಿದಲೆ ಹೋಗಲು ರುಜೆಗಳಿಂ ತನುವೊಡೆದು | ಹಾಳೆಯಂತಕ್ಕು ಸರ್ವಜ್ಞ ||

ಕೂಳು ಕುತ್ತವೆ ಕುತ್ತ ಕೂಳು ಮೇಳವೆ ಮೇಳ | ಕೂಳೊಂದುಗಳಿಗೆ ತಡೆದಿಹರೆ ಪಾತರದ ಮೇಳ ಮುರಿದಂತೆ ಸರ್ವಜ್ಞ ||

ಕೂಳು ಹೋಗುವ ತನಕ | ಗೂಳಿಯಂತಿರುತಿಕ್ಕು | ಕೂಳು ಹೋಗದಾ ಮುದಿ ಬರಲು ಮನುಜನವ | ಮೂಳನಾಯಕ್ಕು ಸರ್ವಜ್ಞ ||

ಕೆಟ್ಟರ್ ದ್ವಿಜರಿಂದ | ಕೆಟ್ಟವರು ಇನ್ನಿಲ್ಲ | ಕೆಟ್ಟುವದು ಬಿಟ್ಟು ನಡೆದರೇ ಅವರಿಂದ | ನೆಟ್ಟನವರಿಲ್ಲ ಸರ್ವಜ್ಞ ||

ಕೆಟ್ಟಹಾಲಿಂದ ಹುಳಿ | ಯಿಟ್ಟಿರ್ದ ತಿಳಿಲೇಸು | ಕೆಟ್ಟ ಹಾರುವವನ ಬದುಕಿಂದ ಹೊಲೆಯನು | ನೆಟ್ಟನೇ ಲೇಸು ಸರ್ವಜ್ಞ ||

ಕೆಂಪಿನಾ ದಾಸಾಳ | ಕೆಂಪುಂಟು ಕಂಪಿಲ್ಲ ಕೆಂಪಿನವರಲ್ಲಿ ಗುಣವಿಲ್ಲ | ಕಳ್ಳತಾ ಕೆಂಪಿರ್ದಡೇನು ಸರ್ವಜ್ಞ ||

ಕೇಡನೊಬ್ಬಗೆ ಬಗೆದು | ಕೇಡು ತಪ್ಪದು ತನಗೆ | ನೋಡಿ ಕೆಂಡವನು ಹಿಡಿದೊಗೆದು ನೋವ ತಾ | ಬೇಲಿ ಬಗೆದಂತೆ ಸರ್ವಜ್ಞ ||

ಕೊಟ್ಟಣವ ಕುಟ್ಟುವದು | ಮೊಟ್ಟೆಯದು ಹೊರಿಸುವದು | ಬಿಟ್ಟ-ಕೂಲಿಗಳ ಮಾಡಿಸುವದು ಗೇಣು | ಹೊಟ್ಟೆ ಕಾಣಯ್ಯ ಸರ್ವಜ್ಞ ||

ಕೊಟ್ಟವರ ತಲೆಬೆನ್ನ | ತಟ್ಟುವರು ಹಾರುವರು | ಕೊಟ್ಟೊಡನೆ ಕುಟ್ಟಿ ಕೆಡಹುವರು ಹಾರುವರ | ಬಟ್ಟೆ ಬೇಡೆಂದ ಸರ್ವಜ್ಞ ||